Անձին հաշվառումից հանելու համար սեփականատերը կամ համասեփականատերերից մեկը անձամբ կամ լիազորված անձի միջոցով կարող է դիմել տվյալ բնակության հասցեն սպասարկող ՄՔԾ տարածքային ստորաբաժանում՝ նախապես այց ամրագրելով migration-e.gov.am կայքով կա՛մ տեղում՝ «կենդանի հերթ» ձևաչափով:

Նախապես էլեկտրոնային հերթագրմամբ այց ամրագրելիս անհրաժեշտ է նշել դիմումատուի տվյալները։ Յուրաքանչյուր այցելուի համար, անկախ տարիքից, անհրաժեշտ է կատարել անհատական հերթագրում։

Առցանց հերթագրվելու համար անհրաժեշտ է՝

• մուտք գործել migration.e-gov.am հարթակ, ընտրել «Հաշվառում/Հաշվառումից հանում» բաժինը և ամրագրել այց,
• նույնականացումից հետո «Դիմորդի էջ»-ում լրացնել պահանջվող տվյալները (անունն ու ազգանունն անհրաժեշտ է լրացնել հայատառ այնպես, ինչպես գրված է անձնագրում) և սեղմել «Հաջորդ էջ» կոճակը,
• բացվող էջի «Այցելության վայր» դաշտում ընտրել հաշվառման վայրի անձնագրային ծառայությունը,
• ընտրել հասանելի օրերից ու ժամերից ամենահարմար տարբերակը։

Իսկ earlyone հավելվածով՝ մուտք գործել «Պետական» դաշտը, ընտրել «Միգրացիայի և քաղաքացիության ծառայություն» բաժինը, մասնաճյուղերից՝ ՆԳՆ ՄՔԾ հաշվառման հասցեն սպասարկող ստորաբաժանում, որից հետո «Հաշվառում/հաշվառումից հանում» ենթաբաժինը և, ըստ պահանջվող հերթականության, լրացնել տվյալները։

Անձը հանվում է հաշվառումից`

• սեփականատիրոջ կամ համասեփականատերերից մեկի դիմումի հիման վրա,
• դատարանի վճռի հիման վրա,
• անձի մահվան դեպքում,
• Հայաստանի Հանրապետության քաղաքացիություն չունեցող անձի մշտական բնակության նպատակով Հայաստանի Հանրապետությունից մեկնելու դեպքում` դրա մասին իր հաշվառման վայրի տեղական ռեգիստրին գրավոր տեղեկացնելու դեպքում,
• Հայաստանի Հանրապետությունում կացության կարգավիճակի վավերականության ժամկետը լրանալու դեպքում,
• Հայաստանի Հանրապետության քաղաքացիությունը դադարեցնելու դեպքում:

Սեփականատերը անձին հասցեի հաշվառումից հանելու համար դիմում է ներկայացնում հասցեն սպասարկող ՄՔԾ ստորաբաժանում՝ կցելով անձնագրի և սեփականության վկայականի պատճենները, իսկ օտարերկրացին՝ ՌԴ քաղաքացու անձը հաստատող փաստաթղթի կամ ՀՀ-ում օրինական բնակությունը հավաստող փաստաթղթի պատճեններ: