ՆԳ նախարարի տեղակալ Արմեն Ղազարյանը փետրվարի 24-ին ընդունել է Միգրացիայի միջազգային կազմակերպության (IOM) Եվրոպայի և Կենտրոնական Ասիայի տարածաշրջանային տնօրեն Արթուր Էրկենին և կազմակերպության Հայաստանյան գրասենյակի ղեկավար Իլոնա Տեր-Մինասյանին։

 Հանդիպման ընթացքում քննարկվել են միգրացիոն հոսքերի կառավարման ռազմավարական մոտեցումները, ինչպես նաև մարդկանց շարժունակության կարգավորման և վերահսկելիության, անվտանգ միգրացիայի ապահովմանն ուղղված գործնական լուծումները։ Անդրադարձ է կատարվել Հայաստանի միգրացիոն դերի վերափոխմանը և ընդգծվել, որ Հայաստանի Հանրապետությունից քաղաքացիների արտագաղթը վերափոխվել է ներգաղթի։

Այս համատեքստում կարևորվել են երկիր մուտք գործող քաղաքացիների սոցիալ-տնտեսական արդյունավետ ինտեգրման և այս ուղղությամբ միգրացիոն քաղաքականության վերաբերյալ հարցերը։ Քննարկվել են նաև ժողովրդագրական զարգացումներն ու տնտեսության կարիքներին համապատասխան մարդկային ռեսուրսների համալրման կարևորությունը։ Անդրադարձ է կատարվել կրթական համակարգի և աշխատաշուկայի պահանջների հարաբերակցությանն ու կարիքներին համահունչ մասնագիտական վերապատրաստումների շարունակականությանը։

Կողմերը մտքեր են փոխանակել միգրացիոն կառավարման գործիքների հնարավորությունների շուրջ՝ խոսելով մուտքի և ելքի հոսքերի առավել արդյունավետ վերահսկմանն ուղղված թվային լուծումների, ինչպես նաև անվտանգ միգրացիոն ուղիների ձևավորման մասին։ Հանդիպման ավարտին կողմերը վերահաստատել են համագործակցության ընդլայնման պատրաստակամությունը՝ ուղղված անվտանգ և մարդակենտրոն միգրացիոն համակարգի զարգացմանը։