Ներկայացնել մուտքի վիզայի հրավեր արտասահմանից ՀՀ ժամանողների համար (որպես անհատ)
Գոյություն ունեն 57 երկրներ, որոնց քաղաքացիները ՀՀ մուտքի վիզա ստանալու համար պետք է ստանան հրավեր ՀՀ-ում գտնվող ֆիզիկական կամ իրավաբանական անձից։
Ֆիզիկական անձը ՀՀ-ում հրավերը ներկայացնում է Թաիրովի 14 հասցեում գտնվող Միգրացիայի և քաղաքացիության ծառայության ստորաբաժանում, իսկ ՀՀ ժամանող անձինք այդ հրավերի հիման վրա կարող են դիմել միայն արտասահմանում գտնվող ՀՀ դեսպանություններ կամ հյուպատոսական հիմնարկներ։
Այս ծառայությունը հասանելի է միայն անձամբ դիմելու ձևաչափով՝ բացառապես օնլայն հերթագրմամբ։
Որպես ֆիզիկական անձ՝ ՆԳՆ Միգրացիայի և քաղաքացիության ծառայություն հրավեր կարող են ներկայացնել`
- Հայաստանում բնակվող ՀՀ քաղաքացիները,
- ՀՀ-ում կացության կարգավիճակ ունեցող օտարերկրացիները։
Պահանջվող փաստաթղթերը
Մուտքի վիզայի հրավեր ներկայացնելու համար պետք է անձամբ մոտենալ և ներկայացնել՝
- հրավերի ձևաթուղթ,
- անձնագիր (օտարերկրացու դեպքում՝ նաև կացության քարտը),
- հրավիրվող անձի անձնագրի պատճենը,
- պետական տուրքի վճարման անդորրագիրը:
- հրավեր ձևակերպելիս՝ հրավեր ներկայացնող անձի ցանկությամբ, կարող են ներկայացվել նաև հրավերը հիմնավորող այլ հավելյալ փաստաթղթեր (օրինակ՝ հրավիրվող անձի հետ ազգակցական կապը հավաստող փաստաթուղթ, հրավիրվող անձի՝ օտարերկրյա պետությունում ունեցած կացության կարգավիճակը և այլն)։
Վճարման չափը և կարգը
Որպես ֆիզիկական անձ ՀՀ մուտքի վիզայի հրավեր ձևակերպելու համար անհրաժեշտ է վճարել 5000 դրամ։ Վճարումը հնարավոր է կատարել տեղում՝ պոս տերմինալի միջոցով կամ առցանց եղանակով, ինչպես նաև ցանկացած բանկում՝ հաշվեհամարին փոխանցում կատարելով (գանձապետական հաշվեհամար՝ 900005162111100)։
Տրամադրման ժամկետը և կարգը
Հրավերը ՆԳՆ ՄՔԾ ստորաբաժանում ներկայացնելուց հետո 15 օրվա ընթացքում որոշում է կայացվում այն հաստատելու վերաբերյալ։ Հրավերի հաստատման դեպքում անձը հեռախոսազանգի միջոցով է տեղեկացվում այդ մասին, իսկ մերժման դեպքում՝ փոստային առաքմամբ։