Օտարերկրացի աշխատակից ներգրավել ցանկացող գործատուները 2022թ․ հունվարի 1-ից թեկնածուի համար աշխատանքի հիմքով կացության կարգավիճակ ստանալու դիմումը ներկայացնում են բացառապես առցանց եղանակով:

Առցանց դիմելու համար անհրաժեշտ է՝ 

• Առցանց դիմել Աշխատանքի թույլտվության էլեկտրոնային համակարգում (workpermit.am)` որպես գործատու (հարթակում գոչծողություններ կարող են իրականացնել գործատուի գործադիր մարմնի կողմից լիազորված անձինք),
• «նոր դիմում» բաժնի «աշխատանքի թույլտվություն» պատուհանում լրացնել թափուր աշխատատեղին վերաբերող տեղեկատվությունը և հաստատել դիմումը։

15 աշխատանքային օրվա ընթացքում ՀՀ Աշխատանքի և սոցիալական հարցերի նախարարության կողմից օտարերկրացի անձի աշխատանքի ընդունելու համաձայնություն ստանալուց հետո անհրաժեշտ է լրացնել օտարերկրացու տվյալները։

Կան որոշ դեպքեր, երբ աշխատանքի թույլտվությունը տրամադրվում է լրացուցիչ փաստաթղթերի հիման վրա։ Տվյալ դեպքերը թվարկված են դիմումի ներկայացման «Բացառությունների ցուցակում ընդգրկված մասնագիտություններ» բաժնում:

Հարթակում աշխատանքային թույլտվության դիմում կարելի է ներկայացնել նաև կամավորության սկզբունքով աշխատողների համար։ Այս դեպքում դիմումը ներկայացվում է դիմումների «Կամավոր» բաժնում։ 

Վճարման չափը և կարգը

Օտարերկրացի աշխատակցի համար ժամանակավոր կացության քարտ թողարկելու վճարը կազմում է 105,000 ՀՀ դրամ։ Վճարումն անհրաժեշտ է կատարել առցանց եղանակով, փոխանցմամբ կամ բանկային գործարքով։

Տրամադրման ժամկետը և կարգը

Կացության քարտը տրամադրվում է գործատուի դիմելուց հետո 30 օրվա ընթացքում։

Օտարերկրացին ստանում է էլեկտրոնային նամակ՝ աշխատանքային գործունեության հիմքով իրեն ժամանակավոր կացության կարգավիճակի տրամադրման վերաբերյալ։ Կացության քարտը ստանալու համար վերջինս պետք է այցելի Վազգեն Սարգսյան 3 հասցեում գտնվող Հանրային ծառայությունների միասնական գրասենյակ (երկուշաբթիից ուրբաթ՝ 09։00-18։00, ընդմիջում՝ 14։00-15։00)։